Në garën më të vjetër e më të madhe në botë “Philip C. Jessup International Law Moot Court Competition” ku marrin pjesë deri në 700 fakultete juridike, me gjithsej 3000 studentë për një vit, ekipi përfaqësues i Fakultetit Juridik të Universitetit të Prishtinës ka shënuar edhe një sukses të dalluar për vitin 2022.
Tre nga studentët pjesëmarrës: Rinor Gjergji, Eranda Zekaj dhe Nol Musa janë vlerësuar në mesin e 200 folësve (oralistëve) më të mirë të këtij viti.
Në listën e publikuar nga organizatorët e garës, vihet re se asnjë shtet në Evropë, me përjashtim të Austrisë dhe Gjermanisë, nuk ka pasur studentë më shumë se Fakulteti Juridik i Universitetit të Prishtinës në listën e 200 më të mirëve. Veç kësaj, krahasuar me rajonin, Fakulteti Juridik është paraqitur dukshëm më mirë, duke pasur më shumë studentë në listë se të gjitha shtetet e Ballkanit marrë së bashku, që kishin vetëm 2.
Ekipi përfaqësues i Fakultetit Juridik për vitin 2022 është përbërë nga studentët: Dea Fetiu, Eranda Zekaj, Nol Musa dhe Rinor Gjergji.
Lista e plotë e 200 studentëve më të dalluar:
“Philip C. Jessup International Law Moot Court Competition” nga ky vit është nga 3 garat që janë pjesë e programit të përhershëm të Fakultetit Juridik të UP-së për përfaqësim në garat ndërkombëtare me prestigjioze për studentët e drejtësisë.
Studentët pjesëmarrës në këtë garë do të jenë edhe pjesë e Grupit të Studentëve të Ekselencës së Fakultetit Juridik, dhe do të kenë mundësi të përfaqësohen edhe në disa aktivitete dhe forume tjera ndërkombëtare.